SÄÄ PELLO

KILPAILUT

VAPAA

VAPAA

Pellon Moottorikerhon historiaa

Pellon Moottorikerho perustethiin virallisesti 16.11.1981. Perustava kokkous piethiin Kauppatielä Ula-baarissa, paremmin tunnethiin nimelä Helkun baari. Kokkoukseen oli tullu neljättäkymmentä
moottoriurheilusta kiinnostunutta Pellosta ja ympäristökylistä. Olihan sitä kyllä harrastettu moottoriurheilua jo aikasemminkin, mutta nyt oli hyä aika perustaa oma erikoisseura ja järjestäytyä omaksi erikoisseuraksi. Samala päätethiin liittyä Moottoriliiton jäseneksi.

Perustavan kokkouksen puhheenjohtajaksi kututhiin Jurvasen Kalervo ja Kalesta
tuli sitte seuran ensimmäinen puhheenjohtaja. Alussa tietekki tuskailthiin
paperihommien kans, piti rekisteröityä ja tehä jos jonkinlaisia papereita.
Sitte päästiin toela vilkhaasti liikheele. Eka vuotena kokkoonnuthin joka viikonloppu
suunnitelehmaan eri tapahtumia ja yritethiin löytää tulisielusia vetäjiä eri jaostojen puheenjohtajiksi. Eikä se ollu rahanhankintakhaan mitenkhään pikku homma, olihan kysseessä alotteleva seura.

Ensimmäisinä vuosina keskitythiin lähinnä moottoripyöräihlyyn, -kelkkaihluun, liitovarjoihluun ja kaikhiin muihin vauhikhaissiin homhiin. Naapuriseuroilta saathiin erittäin tarpheellisia neuvoja ja paljo tukea. Paikallisten yrittäjien ja kunnan kans yhteistyö lähti hyvin liikheele. Kerhohan huolehti heti perustamisen jälkheen mm. kunnan latu- ja kelkkaverkoston kunnossapiosta.

Ko pari vuotta oli kulunu, alethiin harrastaan toela autourheilua, jokkista ja rallia. Löyty muutamia jopa harrastamhaan, ne olit hommanheet ittele kalustoa jokkista ja rallikisoja varten ja ottivat ossaa kilpailuihin Ylitornion UA:n nimissä.
Harrastajien lissääntyessä tuli ajankohtaseksi liittyä Suoman Autourheilijoiden Liithoon, anomukset sisäle. Seura hyväksythiin SAUL.n jäseneksi 1983 ja siitä se alkoki taival autourheilun parissa. Lähethiin kauemmaksiki kissoin ja mm. Vääksyn UA:n kuskit, meän ”kummiseura” suoritit Jussilan Ahin johola
Napapiirin ylityksen jokkiksen merkeissä 1986.

Ensimmäinen kisa järjestethiin Ritavalkeala 1984 Joppari-ajojen nimelä. Samassa paikassa ajethiin ensimmäiset ja toiset Poikkinaintiajokki. Ritavalkeala saathiin olla kaks vuotta, sen jälkeen ei ennää naapuirit suvaihneet sitä pärinää. Samhaan aikhaan alethiin ajahmaan jäärata-ajojaki Jolmanputhaala.

Kittisvaarasta saathiin kunnan myötämielisellä avustuksella uus alue, jota alethiin rakentaa mahottomalla innola 1986. Ensimmäiset PN-ajot ajethiin Kittisvaarassa 12.7.1987. Osallistujia oli heti ensimmäisissä kisoissa naisissa 24 ja ylheisessä 115. Siitä se sitte lähti. Vuosi vuoelta osallistujamäärä kasvo ja kisat  kehitty.

Mikroautorata rakennethiin 1990, kuuluttamotorni 1991 ja kojut ja muut tykötarpheet rakennethiin vuoen 1994 SM-kissoin. Rakentamista on jatkettu koko ajan, viimesin  voimainponnistus on ollu ns. Alppitalo, naapuriseuralaiset kyllä puhuttellee nakkikioskiksi.

Olema me järjestänheet isojaki kisoja, ylheisen luokan SM-kisat vuosina 1994 ja 2009, naisten ja nuorten SM-kisa ajethiin 2004. Kokkeilima me SRC-kissaaki, se ajethiin 2007. Monenlaista sitä on tehty ja työstetty, mutta emmä me meinaa vieläkhään lopettaa. Aina löytyy jotaki uutta tekemistä, meilehän soppii mikä vain, ja jos ei sovi niin sorvathaan.

Menestynheitä kerholaisia

Kovalaisen Anne-Mari on voittanu naistenluokan Suomen Mestaruuen meän nimissä vuosina 1993 Joensuussa, 1995 Kangasniemelä, 1998 Lappajärvela, 1999 Suonenjoela ja 2004 kotikisoissa Pellossa.

Poikkinainti-Team saavutti Anjalankoskela 1992 neljännen sijan ja Tamperheela 1994 kuuennen tilan.
Se oli hyvä saavutus silloisissa kisoissa, joukkuuheita oli 1992 pitkästi yli kuuskymmenä.



Näin muisteloi meänkielellä Arja N